Ертең Астанада «Оқырман ұрпақ – Қазақстанның болашағы» кітап фестивалі ашылады

21.08.2015 12:00 1520


 

22 тамызда Нұржол желекжолында Қазақ хандығының 550 жылдығына, Ұлы Жеңіске – 70 жыл, Қазақстан Республикасы Конституциясының және Қазақстан халқы Ассамблеясының құрылғанына 20 жыл толуына, сондай-ақ жаңа оқу жылының басталуына байланысты «Оқырман  ұрпақ – Қазақстанның болашағы» тақырыбымен кітап фестивалі өтеді.   

Аталған шараның негізгі мақсаты – кітапты насихаттау, өскелең ұрпақтың рухани-адамгершілік білімін арттыру, жастардың  кітап оқуға, көркем әдебиетке деген құштарлығын ояту.  

Фестивальге еліміздегі белгілі мемлекет және қоғам қайраткерлері, Ж. Әбділдин, Ә. Тарази, Р. Мұқанова, Т. Әбдік, Қ. Сақ, Қ. Болманов, Қ. Әбілдина, Б. Сәмединова сынды зиялы қауым өкілдері қатысады. Сондай-ақ Астанадағы шетелдердің Төтенше және Өкілетті Елшілері, елордалық баспалар мен кітап сатушы ұйымдар қатысады.

Фестиваль бағдарламасы халықтың барлық категориясын қамтитын сан алуан іс-шаралар кірістірілген. Бұлар «Оқуға арналған сәт» флешбугы, «Бәрі кітаптан басталады» флешмобы, QR-код мобильді кітапханасының тұсаукесері, «Бір ел – бір кітап» акциясы аясындағы «Көшпенділер» романы – көшпелі өркениеттің айнасы іспетті» тақырыбында іс-шара, Е. Кочетовтың «Қазақстанды өзгерткен сөздер» атты кітабының тұсаукесері, «Қайсар Әлия» атты ерлік сабағы, кітап жәрмеңкесі, кітап сыйлау акциясы, «2015 жылдың мерейтой иелері – Нобель сыйлығының лауреаттары» көрмесі, «Жастар классиканы оқиды» атты оқырман жастармен кездесу өтеді. «Оқырмандар кеңесі». Фестиваль барысында Қазақстанның облыстық кітапханаларымен онлайн-кездесу өтеді.     

Сондай-ақ «Поэзия саған мың алғыс!» тақырыбында поэзия марафоны,  қазақтың белгілі жазушысы Тұманбай Молдағалиевтің 80 жылдық мерейтойына арналған «Қазақ деген халықтың баласымын» тақырыбындағы поэзия сағаты, концерт ұйымдастырылады. Бұдан бөлек, Ақмола облысы кітапханашылары «2015 жылдың мерейтойлық күндері» бағдарламасы бойынша іс-шара өткізеді.

Фестивальде жаңа кітаптармен танысуға, әйгілі ақын-жазушылармен кездесуге, таңдаулы авторлар туралы тереңнен танысып, уақытты барынша ұтымды өткізуге мүмкіндік беріледі.

по материалам: mks.gov.kz