Қазақстанның Индонезиядағы мәдениет күндері басталды

Мәдениет күндерінің аясында Қазақстан өнер шеберлерінің қатысуымен гала-концерт өтті. 1200 орындық концерттік зал қатарында дипломаттық корпус, үкімет өкілдері бар индонезиялық көрермендерге лық толы болды.

Гала-концертте ҚР халық әртістері Ескендір Хасанғалиев және Нұржамал Үсенбаева, ҚР еңбек сіңірген қайраткері Алтынай Жорабаева, халықаралық конкурс лауреаттары Біржан Хасанғалиев, Данияр Байжуманов, Балжан Жүнісова, Медет Шотабаев, және де Нұрғиса Тілендиев атындағы «Отырар сазы» академиялық этно-фольклорлық оркестрі, «Белес» этно-фолк тобы және «Салтанат» мемлекеттік ансамблі өнер көрсетті.

Концерттік бағдарлама көрермендерге Қазақстанның бай ұлттық музыкалық құндылықтарын тамашалауға мүмкіндік берді. Әншілер мен бишілерге қолдау көрсеткен Нұрғиса Тілендиев атындағы «Отырар сазы» академиялық этно-фольклорлық оркестрін ҚР еңбек сіңірген қайраткері Дінзухра Тілендиева және халықаралық конкурстар лауреаты Ерболат Ахмедьяров басқарды. Қазақстан және Татарстанның халық әртісі Нұржамал Үсенбаева және халықаралық конкурстар лауреаты Медет Шотабаев академиялық вокал ғана емес халық әндерін де шырқаған еді.

Джакартадағы концерттік залдың сахнасында жетіген орындаушыларының квартеті (Қорлан Картенбаева, Әйгерім Дайрабаева, Нұргүл Қуандық, Аяулым Мұқабелқызы), қобызшы Балжан Жүнісова, «Белес» этно-фолк тобы өз өнерлерін ортаға салды. Концерт барысында Түркеш, Үкілі Ыбырай, Ықылас сияқты халық композиторларының шығармалары, классикаға айналған Абайдың «Айттым сәлем Қаламқас» және Нұрғиса Тілендиевтің «Саржайлау» әндері шырқалды. Қазақстанның халық әртісі, композитор Ескендір Хасанғалиев өзінің «Туған жер» және ұлы Біржанмен бірге «Атамекен» сияқты ең танымал әндерін ортаға салды.

по материалам www.mk.gov.kz