Министр Бауыржан Жауынтаевты Нанкинде өтіп жатқан жасөспірімдер Олимпиада ойындарындағы жеңісімен құттықтады

Қазақстан Республикасының мәдениет және спорт министрі Арыстанбек Мұхамедиұлы Бауыржан Жауынтаевты Нанкиндегі жасөспірімдер арасындағы ІІ Олимпиада ойындарында дзюдодан (55 кг дейінгі салмақ категориясы) алтын жүлделі жеңісімен құттықтады. Құттықтау жеделхатта:

«Қымбатты Бауыржан! Сені жасөспірімдер арасындағы II олимпиада ойындарындағы жеңісіңмен шын жүректен құттықтаймын!

Сен жасөспірімдер арасындағы II олимпиада ойындарында біздің құрама командаға алғашқы алтын медальды әкелдің. Бұл жетістік еліміздің миллиондаған азаматтары мен біздің жастар командасына сенген, үміт артқан жандар үшін қуанышты оқиға болды.  

Шиеленіскен тартысты бәсекеге қарамастан сен нағыз спортшыға тән қайсарлық пен шеберлік таныта білдің. Егемен еліміз үшін, тәуелсіз Қазақстанның жас ұрпағы үшін бойымызды шексіз мақтаныш сезімі кернейді. 

Бұл Нанкиндегі қазақстандық спортшылардың жарқын жеңістерінің бастауы деп білемін. Біздің спортшыларымыздың шығар биігі әлі алда, олар олимпиада эстафетасын сәтті аяқтайды деп сенемін. 

Біздің жаттықтырушыларды спорттағы үлкен жетістіктерімен құттықтаймын. Қазақстандағы жастар спортын дамытуға қосқан еңбектеріңізді жоғары бағалаймыз,» - деп жазылған.

по материалам www.mk.gov.kz