«Астана Опера» театрының әртістері «Бәрі махаббат жайлы» концертін ұсынады

2015 жылдың 13 ақпанында «Астана Опера» театрының Камералық залында «Бәрі махаббат жайлы» атты концерт өтеді. Концерттің авторы – белгілі концертмейстер Ирина Кургузкина.

Махаббат – шығармашылық адамдары – музыканттар, ақындар, суретшілер үшін берекелі тақырып. Олардың туындыларында қыруар сезім, сол сезімге тән: қуаныш пеншаттықтан бастап, қызғаныш пен ызаға дейін кездеседі.

Тыңдарманға мереке сыйлап, оларды өздерімен бірге күліп, уайымдауға мәжбүр ететін «Астана Опера» театрының солисттері:Айгүл Ниязова, Роза Нұркей (сопрано), Гүлжанат Сапақова (меццо-сопрано), Бейімбет Таңарықов, Нарұл Тойкенов (тенорлар), Жанат Шыбықпаев, Ескендір Әбжанов және Қазыбек Досмұхамбетов (баритондар), Артұр Қайыпқұлов (бас). Махаббат музыкасын тағы оркестр солисттері Қаламқас Жұмабаева (скрипка) мен Станислав Омаров (кларнет) орындайды.