Біз туралы

Жарияланымдар

Білім базасы

Қазақстанның дәстүрлі және қазіргі заманғы өнері

Қазақстанның көркем мұрасына виртуалды саяхат

Бұл веб-галерея Қазақстанның бай көркемдік мұрасын және қазіргі өнердегі шығармашылық бағыттардың алуан түрлілігін таныстырады. Галереяда ұлттық дәстүрлерді жалғастыратын, сондай-ақ қазіргі заманғы өнер үдерістерін көрсететін туындылар ұсынылған.

Виртуалды көрмеге ұлттық бейнелерге, рәміздерге және мәдени сюжеттерге негізделген шығармалар енгізілген. Сонымен қатар мұнда Қазақстанның мәдени мұрасын заманауи көркемдік тәсілдер, жаңа бейнелеу құралдары мен технологиялар арқылы жаңаша түсіндіретін қазіргі суретшілердің еңбектері де қамтылған.

Ұсынылған шығармалар дәстүрлі өнер мен қазіргі өнердің өзара байланысын көрсетеді. Олар ұлттық дүниетанымды, мәдени бірегейлікті және халқымыздың рухани құндылықтарын тереңірек түсінуге мүмкіндік береді. Бұл материалдар арқылы тарихи-мәдени мұраның қазіргі көркемдік тәжірибеде қалай жалғасып, жаңа мазмұнмен дамып жатқанын көруге болады.

Веб-галерея Қазақстанның көркем мұрасын кеңінен насихаттауға бағытталған. Оның басты мақсаты — өнер туындыларын көпшілікке қолжетімді ету, сондай-ақ кең аудиторияның отандық мәдениет пен өнерге деген қызығушылығын арттыру.

Қоржын, 1950

1950-жылдар. Қызылорда облысы. Жүн, тоқу. Қазақстан Республикасы Мемлекеттік өнер музейі (Әбілхан Қастеев атындағы) коллекциясы.

Қоржын, 1950

«Қоржын — ортаңғы бөлігі (тұтқасы) арқылы жалғасқан, екі симметриялы қалтасы бар дәстүрлі қап. Ол заттарды тасымалдау және сақтау үшін қолданылған, ер-тоқымға немесе түйе теңіне бекітілетін болған.Бұл үлгі жүн жіптен тоқу техникасымен жасалған. Ою-өрнегі, әдетте, қоржынның екі «қанатының» симметриялық принципіне негізделіп құрылады. Композициясы нақты геометриялық пішіндерімен ерекшеленеді: ромб тәріздес гүлді өрнектер (розеткалар), түрлі геометриялық элементтер, ирек және жолақ түріндегі мотивтер қолданылған. Түстер гаммасы дәстүрлі түрде қарама-қайшы (контраст) келеді, мұнда қызыл түс басым болып, қара, ақ, көк немесе жасыл реңктермен үйлесім тапқан.Қазақ мәдениетінде қоржын — молшылықтың, қонақжайлылықтың және отбасылық берекенің нышаны болып табылады».