Біз туралы

Жарияланымдар

Білім базасы

Қазақстанның дәстүрлі және қазіргі заманғы өнері

Қазақстанның көркем мұрасына виртуалды саяхат

Бұл веб-галерея Қазақстанның бай көркемдік мұрасын және қазіргі өнердегі шығармашылық бағыттардың алуан түрлілігін таныстырады. Галереяда ұлттық дәстүрлерді жалғастыратын, сондай-ақ қазіргі заманғы өнер үдерістерін көрсететін туындылар ұсынылған.

Виртуалды көрмеге ұлттық бейнелерге, рәміздерге және мәдени сюжеттерге негізделген шығармалар енгізілген. Сонымен қатар мұнда Қазақстанның мәдени мұрасын заманауи көркемдік тәсілдер, жаңа бейнелеу құралдары мен технологиялар арқылы жаңаша түсіндіретін қазіргі суретшілердің еңбектері де қамтылған.

Ұсынылған шығармалар дәстүрлі өнер мен қазіргі өнердің өзара байланысын көрсетеді. Олар ұлттық дүниетанымды, мәдени бірегейлікті және халқымыздың рухани құндылықтарын тереңірек түсінуге мүмкіндік береді. Бұл материалдар арқылы тарихи-мәдени мұраның қазіргі көркемдік тәжірибеде қалай жалғасып, жаңа мазмұнмен дамып жатқанын көруге болады.

Веб-галерея Қазақстанның көркем мұрасын кеңінен насихаттауға бағытталған. Оның басты мақсаты — өнер туындыларын көпшілікке қолжетімді ету, сондай-ақ кең аудиторияның отандық мәдениет пен өнерге деген қызығушылығын арттыру.

Дастарқан ХХ ғ.

Түркістан облыстық тарихи-өлкетану музейі.

Скатерть.

Дөңгелек пішінді дастархан ашық қоңыр түсті жүн матадан тігілген. Бұйымның беті түрлі-түсті жіптермен орындалған бай кестелі өрнекпен әшекейленген. Композиция орталық симметрия қағидасы бойынша құрылған: дәл ортасында дөңгелек медальон орналасқан, одан өрнектік элементтер бүкіл бетке таралып, үйлесімді әрі теңгерімді сәндік құрылым қалыптастырады.Өрнек қазақтың дәстүрлі халық өнеріне тән мотивтерден тұрады: гүл, шиыршық, шұғыла, үшқұла, ботакөз және төртқұлақ. Бұл оюлар өсімдік тектес және геометриялық формалардың күрделі жүйесін құрап, қазақтың сәндік-қолданбалы өнеріне тән көркемдік ерекшелікті көрсетеді.Түстік шешім қызыл, жасыл және сары реңктердің үйлесіміне негізделген. Бұл түстер ашық қоңыр мата фонымен контраст жасап, өрнектің көркемдік әсерін күшейтеді. Дастарханның жиегі таңқурай түсті және сары жібек жіптерден жасалған шашақтармен көмкерілген, бұл бұйымға толық әрі аяқталған көркемдік бейне береді.