Жеңімпаз, 2024 жыл. Керамика, глазурь. Алматы.
Индира Озбекова
«Жеңімпаз» бейнесі ықшам әрі жинақталған пластикалық шешім арқылы беріліп, адам тұлғасы символдық мәнге ие болған. Керамика мен жылтыр сырдың (глазурьдің) қолданылуы композицияның пластикалық жұмсақтығын күшейтіп, беткі қабаттың көркемдік әсерін айқындай түседі.Мүсін ішкі кернеу күйінде бейнеленген. Артқа шалқайған дене мен кең қойылған аяқтар күш-жігер мен қарсыласуды еңсеру арқылы қол жеткізілген орнықтылықты білдіреді. Найзаның тік орналасуы композиция кеңістігін ұйымдастырып, оның мағыналық әрі ырғақтық өзегіне айналады. Сонымен қатар ол бүкіл мүсіннің пластикалық тепе-теңдігін сақтайтын негізгі элемент ретінде көрінеді.Шығарманың пластикалық тілі көлемдердің жұмсақ әрі тұтас ағысына негізделген және адам денесінің анатомиялық бөлшектерін егжей-тегжейлі бейнелеуден саналы түрде бас тартылған. Дене біртұтас пластикалық көлем ретінде қабылданады. Ал арқа сызығы, қол қимылы мен бастың бұрылуы сияқты жекелеген бөлшектер айқынырақ көрсетіліп, әсерлі силуэт қалыптастырады. Осы тәсілдің нәтижесінде образ шарттылық пен эмоциялық шиеленісті қатар сақтайды.Шығармада глазурьмен өңделген беткі қабат ерекше көркемдік рөл атқарады. Жылтыр және күңгірт бөліктердің өзара алмасуы тірі әрі үнемі өзгеріп тұратын материал әсерін береді. Беткі қабаттың біркелкі еместігі мен қолмен өңдеу іздерінің сақталуы туындының авторлық қолтаңбасын айқындап, пластикалық табиғилығын күшейтеді.Композицияның мазмұны сыртқы жеңістен гөрі адамның өзін-өзі жеңуі мен ішкі кедергілерді еңсеру идеясына негізделген. Нақты даралық белгілердің болмауы бейнені ерік-жігері мен рухани беріктігінің арқасында мақсатына жеткен адамзатқа ортақ символдық тұлға деңгейіне көтереді. Бұл тұрғыдан найза мақсатқа ұмтылудың, күш-қуаттың және рухани шоғырланудың белгісі ретінде қабылданады. Шығарманың эмоциялық әсерлілігі пішіннің ырғақты құрылымы, материалдың фактуралық ерекшелігі және образдың символдық тереңдігі арқылы ашылады.