Ерлер белбеулері, күміс, ақық (сердолик), былғары; сымкәптеу (скань), түйіршіктеу (зернь), қаралау (чернь), бедерлеу. Дереккөз: автордың Instagram парақшасы — @jeweller_berik_alibai.
Берік Әлібай
Ерлер белбеулерінің сериясы дәстүрлі стильде орындалған, авторлық интерпретация элементтері енгізілген былғары белбеулер мен сәндік металл айылбастардан тұрады. Әр бұйымда композициялық әрі мағыналық орталық қызметін атқаратын негізгі элемент – айылбас. Ол белбеудің көркемдік келбетін айқындап, оның идеялық мазмұнын ашады.Көркемдік шешім икемді былғары негіз бен металл бөліктердің геометрияланған пішіндерінің үйлесіміне негізделген. Белбеудің беті өсімдік және геометриялық сипаттағы бедерлі ою-өрнектермен безендіріліп, ырғақты қайталанатын фриз түрінде ұйымдастырылған. Айылбастар скань, түйіршіктеу (зернь) және қаралау (чернь) техникалары арқылы мұқият өңделіп, күрделі графикалық құрылым қалыптастырады әрі ою-өрнектің тереңдігі мен көркемдік әсерін күшейтеді. Орталық бөлікке қондырылған ақық (сердолик) тастары композицияның басты көркемдік екпінін жасап, бұйымның пластикалық тұтастығын арттырады.Қазақтың дәстүрлі мәдениетінде белбеу ер адамның әлеуметтік мәртебесін, кемелдігін және ерлік болмысын білдіретін маңызды нышан болып саналады. Айылбас күштің, беріктіктің және тұрақтылықтың белгісі ретінде қабылданып, бұйымның негізгі символдық жүгін өзіне шоғырландырады. Бұл контексте ақық (сердолик) қорғаныштық қасиетке ие тас ретінде маңызын сақтаса, ою-өрнектік мотивтер тәртіпті, тұрақтылықты және ұрпақтар сабақтастығын бейнелейді.Шебер ерлер белбеуінің дәстүрлі типологиялық ерекшеліктерін сақтай отырып, олардың сәндік және материалдық көркемдігін жаңа деңгейге көтереді. Соның нәтижесінде белбеулер тұрмыстық мақсаттағы зат қана емес, ұлттық зергерлік мұраны заманауи мәдени кеңістікте жалғастыратын дербес көркемдік нысан ретінде қабылданады.