Қазақстанның дәстүрлі және қазіргі заманғы өнері

Қазақстанның көркем мұрасына виртуалды саяхат

Бұл веб-галерея Қазақстанның бай көркемдік мұрасын және қазіргі өнердегі шығармашылық бағыттардың алуан түрлілігін таныстырады. Галереяда ұлттық дәстүрлерді жалғастыратын, сондай-ақ қазіргі заманғы өнер үдерістерін көрсететін туындылар ұсынылған.

Виртуалды көрмеге ұлттық бейнелерге, рәміздерге және мәдени сюжеттерге негізделген шығармалар енгізілген. Сонымен қатар мұнда Қазақстанның мәдени мұрасын заманауи көркемдік тәсілдер, жаңа бейнелеу құралдары мен технологиялар арқылы жаңаша түсіндіретін қазіргі суретшілердің еңбектері де қамтылған.

Ұсынылған шығармалар дәстүрлі өнер мен қазіргі өнердің өзара байланысын көрсетеді. Олар ұлттық дүниетанымды, мәдени бірегейлікті және халқымыздың рухани құндылықтарын тереңірек түсінуге мүмкіндік береді. Бұл материалдар арқылы тарихи-мәдени мұраның қазіргі көркемдік тәжірибеде қалай жалғасып, жаңа мазмұнмен дамып жатқанын көруге болады.

Веб-галерея Қазақстанның көркем мұрасын кеңінен насихаттауға бағытталған. Оның басты мақсаты — өнер туындыларын көпшілікке қолжетімді ету, сондай-ақ кең аудиторияның отандық мәдениет пен өнерге деген қызығушылығын арттыру.

Салпыншақ (авторлық композиция), металл (күміс/қорытпа), көгілдір ақық (бирюза), түрлі түсті қондырмалар (шыны/смальта), органикалық материалдар; құю, дәнекерлеу, инкрустациялау, құрастыру (mixed media)

Абай Сұлтан

Абай Султан. Подвеска (авторская композиция),металл (серебро/сплав), бирюза, цветные вставки (стекло/смальта), органические материалы; литьё, пайка, инкрустация, сборка (mixed media)

Көп бөліктен тұратын кеудеге тағылатын салпыншақты әшекей бірнеше қозғалмалы сегменттерден құралған, тік бағытта дамытылған композициялық қағидаға негізделген. Құрылымы жоғарғы сәндік модульден, мозаикалық құрылымды орталық бөліктен және ою-өрнекпен толықтырылған төменгі салпыншақты элементтен тұрады.Композиция өзара ырғақты жүйеге біріктірілген геометриялық және органикалық пішіндердің үйлесімінен құралған. Орталық бөлігі трапеция тәрізді пішінде орындалып, мозаикалық қондырмалармен және түрлі тастармен бай безендірілген. Олардың ішінде көгілдір ақық (бирюза) пен қызыл түсті сәндік екпіндер ерекше көзге түседі. Төменгі ұзынша элемент кескіндемелік сипаттағы бай фактурасымен ерекшеленіп, ою-өрнекті салпыншақты дөңгелек дискілермен толықтырылған. Тығыз және ашық өңделген бөліктердің кезектесуі күрделі пластикалық құрылым қалыптастырып, композицияның қозғалыс әсерін күшейтеді.Ою-өрнектік мотивтер мен тас қондырмалар дәстүрлі дүниетаным мен авторлық көркемдік пайымдауды тоғыстырған көпқабатты символдық жүйені құрайды. Көгілдір ақық (бирюза) қорғаныш пен рухани үйлесімділіктің белгісі ретіндегі дәстүрлі мағынасын сақтаса, мозаикалық бет қазіргі заманғы күрделі мәдени бірегейліктің метафорасы ретінде қабылданады. Қозғалмалы бөлшектер композицияның серпінін арттырып, дыбыс пен қозғалысқа негізделген дәстүрлі салттық әшекейлермен идеялық сабақтастық орнатады.Шығарманың басты ерекшелігі – классикалық зергерлік әшекейден нысандық және тұжырымдамалық өнерге тән көркемдік шешімге көшуінде. Әртүрлі материалдардың қолданылуы, көпқабатты композициялық құрылым және күрделі фактуралық ұйымдастыру бұл салпыншақты тек сәндік бұйым шеңберінен шығарып, дербес көркемдік нысан деңгейіне көтереді. Соның нәтижесінде шығарма заманауи зергерлік өнерге тән символиканы, сәндік көркемдікті және эксперименттік пластиканы бір арнада тоғыстырған өнер туындысы ретінде қабылданады.

Фото: А. Ибрагимов, «Nomad Art» көрме-жәрмеңкесі

Біз туралы

Жарияланымдар

Білім базасы

Қазақстанның дәстүрлі және қазіргі заманғы өнері