Қазақстанның дәстүрлі және қазіргі заманғы өнері
Қазақстанның көркем мұрасына виртуалды саяхат
Бұл веб-галерея Қазақстанның бай көркемдік мұрасын және қазіргі өнердегі шығармашылық бағыттардың алуан түрлілігін таныстырады. Галереяда ұлттық дәстүрлерді жалғастыратын, сондай-ақ қазіргі заманғы өнер үдерістерін көрсететін туындылар ұсынылған.
Виртуалды көрмеге ұлттық бейнелерге, рәміздерге және мәдени сюжеттерге негізделген шығармалар енгізілген. Сонымен қатар мұнда Қазақстанның мәдени мұрасын заманауи көркемдік тәсілдер, жаңа бейнелеу құралдары мен технологиялар арқылы жаңаша түсіндіретін қазіргі суретшілердің еңбектері де қамтылған.
Ұсынылған шығармалар дәстүрлі өнер мен қазіргі өнердің өзара байланысын көрсетеді. Олар ұлттық дүниетанымды, мәдени бірегейлікті және халқымыздың рухани құндылықтарын тереңірек түсінуге мүмкіндік береді. Бұл материалдар арқылы тарихи-мәдени мұраның қазіргі көркемдік тәжірибеде қалай жалғасып, жаңа мазмұнмен дамып жатқанын көруге болады.
Веб-галерея Қазақстанның көркем мұрасын кеңінен насихаттауға бағытталған. Оның басты мақсаты — өнер туындыларын көпшілікке қолжетімді ету, сондай-ақ кең аудиторияның отандық мәдениет пен өнерге деген қызығушылығын арттыру.
Тәуелсіз Қазақстанның өнері
Mixed media
- «Умайдың бейнесі: Сенім – Сенімсіздік». 2015. Аралас техника.
- «Умайдың бейнесі: Өткен – Болашақ». 2015. Аралас техника.
- «Қобызшы». 2023–2024. Аралас техника (авторлық шекіме, металл, рельеф). Дереккөз: Business FM Kazakhstan (https://businessfm.kz).
- «Кездесу». 2017–2023. Аралас техника. Дереккөз: Business FM Kazakhstan (https://businessfm.kz).
- «Жарық дүние», 2016 жыл. Оргалит, майлы бояу, кесте.
- «Архетиптер», 2020 жыл. Аралас техника.
- «Соғым», 2016 жыл. Кенеп, акрил, аралас техника.
- «Шаңырақ». 2012 жыл. Аралас техника. Дереккөз: Nomad-Kazakhstan журналы, № 53-54 (1/2) 2014
- «Шығармашылық», 2012 жыл. Аралас техника.
- «Сандық», 2023 жыл. Кенеп, акрил, мата
- «Сынық мүйіз», 2024 жыл. Бетон, металл, рельефті паста
- Суретші Сабыржанқызы Әсел (шығармашылық псевдонимі – Ассоль).
- «Көкбөрі», 2023 жыл. Кілем, аэрозольді бояу.
Қазақстанның заманауи өнеріндегі mixed media бағыты көркемдік тәжірибенің қарқынды дамып келе жатқан және визуалды мәдениеттің трансформациялық үдерістерін айқын көрсететін маңызды салаларының бірі болып табылады. Бұл бағыт бір көркем туынды аясында әртүрлі материалдар, техникалар мен медиумдарды біріктіруге негізделеді. Олардың қатарына кескіндеме, тоқыма өнері, коллаж, фотография, цифрлық графика, инсталляция, сондай-ақ сәндік-қолданбалы өнер элементтері жатады. Қазақстандық өнер кеңістігінде mixed media ерекше сипатқа ие. Қазіргі суретшілер киіз, тоқыма, кесте, былғары, металл, ою-өрнек композициялары сияқты дәстүрлі материалдарды заманауи көркемдік тәсілдермен үйлестіріп, жаңа көркемдік тәжірибелер қалыптастыруда. Осы тұрғыдан алғанда, бұл бағыттың көркемдік практикасы пәнаралық сипатқа ие болады.
Қазақстандық mixed media өнерінің маңызды бағыттарының бірі – тоқыма өнерінің концептуалдық көркемдік ой айту формасына айналуы. Отандық суретшілер шығармаларында тоқыма материалдары тек заттық нысан ретінде ғана емес, тарихи жадымен, мәдени сабақтастықпен, архетиптік бейнелермен және ұлттық дүниетаныммен байланысты символдық мағыналардың тасымалдаушысы ретінде көрінеді. Киізді, дәстүрлі маталарды, текемет элементтерін және кесте өнерін пайдалану арқылы авторлар ұлттық мәдени кодтарды жаңа көркемдік контексте қайта жаңғыртып, заманауи интерпретациялайды.
Отандық mixed media өнерінің дамуына мәдени гибридтілік (cultural hybridity) тұжырымдамасы да елеулі ықпал етеді. Бұл құбылыс жергілікті мәдени дәстүрлер мен жаһандық көркемдік тәжірибелердің өзара әрекеттесуіне негізделген. Соның нәтижесінде дәстүрлі символдар постмодернизм эстетикасымен, инсталляция өнерімен, digital art бағыттарымен, перформанс пен interdisciplinary art тәжірибелерімен ұштасқан жаңа визуалды тіл қалыптасады. Мұндай синтез ұлттық мәдени ерекшелікті сақтай отырып, оны әлемдік көркемдік үдерістермен байланыстырады.
Визуалды семиотика тұрғысынан Қазақстандағы mixed media туындыларын мәдени кодтар мен таңбалық құрылымдардың күрделі жүйесі ретінде қарастыруға болады. Мұндай шығармаларда материал тек техникалық қызмет атқарып қана қоймай, маңызды семантикалық мәнге ие болады. Киіздің фактурасы, металдың құрылымы, матаның пластикасы немесе цифрлық бейненің визуалды әсері туындының мағыналық мазмұнын қалыптастыруға тікелей қатысады. Осы тұрғыдан алғанда көркемдік нысан мәдени коммуникацияның ерекше формасына айналып, онда материал, фактура және визуалды құрылым көркем идеяны жеткізудің негізгі құралдары ретінде қызмет етеді.